مايكل نبيل ، رجل بلا مكان

من كام شهر فات .. كتبت و مثلت عرض مونو دراما قصير ، و بعدها عملت المدونة دي بنفس الإسم ..و العرض كان مُلهَم بشكل أساسي من سيرة الناشط الحقوقي مايكل نبيل سند.
ساعتها كان مايكل يا دوب لسة داخل السجن بسبب مقاله الشهير " الجيش و الشعب عمرهم ماكانوا إيد واحدة " ، و اللي أعلن فيه تخوف واضح من قيادات المؤسسة العسكرية ، و ولاءها للنظام المخلوع ، و هي أفكار كانت سابقة جدا لأوانها ، و بالتالي مالقتش أي تعاطف من حد ، و لا مايكل لقاه .
المهم إني حاولت أعرض بعض أفكار لمايكل ، كان أهمها الأفكار اللي أنا إقتنعت بيها من خلاله زي موضوع التجنيد الإجباري مثلا .. و كتبت و قُلت : إن التجنيد الإجباري بيرجعنا لعصر العبيد اللي بيخدموا تحت رجلين إسيادهم اللواءات ،  يا إما بيمارسوا أدوار أمن مركزية قذرة تحت شعار " التجنيد " شرف المواطنة .

قضية منفردة زي دي ممكن تكون مثال بارز نفهم منه مايكل ..
مايكل اللي خد إعفاءه من الجيش عمره ما بطل يتكلم و يدون ضد التجنيد الإجباري .. في مثال واضح للمفكر الحر الغير مقيد بخطوط حمرا أو مصالح خاصة ، مايكل اللي ماعتبش الجيش كان صاحب دعوة إصطحاب المجندين للتليفونات المحمولة كحق إنساني أصيل .

و أفتكر إن مرة حد متعقل كان مختلف مع مايكل ، و وصفه إنه سياسي فاشل ، بسبب إن كل أفكاره في عكس التيار ، و مش بيدي لفريق أو جماعة فرصة لتأييده ، كونه بيضرب بكل الثوابت عرض الحائط .. ساعتها كان رد مايكل عليه : إنه مش سياسي أبدا ، و إن كل همه في التفكير  ، و التعبير عن أفكاره بحرية

بعد ما عرضت المونو دراما القصيرة بتاعتي مرتين ، و بعد ما آلت إليه ثورتنا المجيدة ، حسيت بالقرف التام و إبتعدت - أنا و غيري - عن الشأن العام تماما .. يا دوب بنتفرج على المولد من بعيد لبعيد .. و إحنا حاسين إن روحنا اللي كنا شايلينها على كتافنا يا دوب من كام شهر ، قد سحقت تماما ، و معها كل الآمال و كل الأفكار .
الأفكار ليها أجنحة .. بس إحنا للأسف بنحترف دبح الطيور ، و خالقيها كذلك !!
( و مين يجز بإيده الورد ، يقص قصد جناح عصفور ) 
 من كام يوم قريت خبر في الدستور إن مايكل هايبتدي إضراب عن الأكل بسبب إنه أول سجين رأي بعد الثورة اللي ماحدش سأل فيه ، و حتى النقض بتاعه ، رفضوا يستلموه !
فكرني بأسلوب غاندي قوي .. كتبت التعليق دة : "مايكل مفكر حر في بلد لا يدرك عامتها معاني التفكير و الحرية.. و المجلس العسكري مستغل جيد للواقع المخزي"
بعدين فكرت في إننا مش بس اللي بندبح الحمام و صحابه .. ماغندي مات مقتول .. و جون لينون مقتول !!
و حشني مايكل قوي قمت دخلت على الصفحة بتاعته و قريته كاتب :
"أحا ، يعنى انا مضطهد فى مصر ، و حكومة نتنياهو بتعمل المستحيل علشان مدخلش إسرائيل ، و دلوقتى بيقولولى متجيش لبنان علشان حزب الله مش هيعتقك ، و البعث السورى بينى و بينه معزة قديمة و مش هعرف ادخل سوريا تانى فى ظل وجود النظام البعثى ، و امريكا و بريطانيا عاملين نفسهم ميعرفونيش ... أنا كدة شكلى هقدم على لجوء سياسى فى كوكب المريخ ، كوكب الأرض متآمر ضد مايكل نبيل"
زي ما جون لينون كتب عن نفسه إنه رجل اللا مكان

He's a real nowhere man,
Sitting in his Nowhere Land,
Making all his nowhere plans
for nobody.