و بعد ما باعت شهرزاد كل الورق اللي مرسوم عليه الحكايا الساحرة لراجل عجوز كفيف ، و قبضت تمنها بندق و لوز و جوز و ياميش ، و غزل بنات و فلوس كتيرة .. ماحدش نقم عليها خالص ، عشان من زمان لما إتوجد البني آدمين في الكون .. إتقسموا صنفين : ناقمين ما بيحبوش حكايا ألف ليلة ، و متفهمين بيحبوا سحر الحكايا ، و بقيت أنا في المعضلة دي لأبد الآبدين و يوم الدين .. أغنية شهرزاد بترن في وداني ، هربت من العالم اللي مليان ساعات بتدق بصوت عالي بيخوف ، و حكايات بتتهمس للصحاب القليلين اللي سامحوا شهرزاد و غنوا غنوتها معايا في السر : شهرزاد اللي ياما عاشت ليالي الخوف من دق الساعات ، و باعت حكايتها مع العالم مع .. كل الحاجات .... إشترت فستان قصير و إشترت أحمر شفايف .. إشترت عيون بتلمع ، تنده اللي ماشي شايف .. و إشترت ( برة ) يغير ، كل ( جواها ) اللي خايف ...
قمت أنا فهمت ، و أنا باشتري الكتاب اللي مرسوم عليه السحر من راجل عجوز نظره إتسرق منه في حانة بتقدم العنبية اللي مصنوعة من القش ، إن شهرزاد باعت قبل ما تتباع في المزاد العلني : ألا أون ألا دوي ألا تري .. بـ ولا حاجة !
ملحوظة لازم تيجي في الأول : النص كله بالعامية.
الجاردينيا اللي لونها أبيض زي التلج قلبها موصول برفرفات كتيرة مابتبطلش ، لفراشات بتحب تلف و تدور .. حوالين بيت الجاردينيا الفضي .. بيسحرهم اللون الأبيض و بيملا قلوب الورود التانية الملونة : بأحمر و وردي و طماطم ، بمشاعر قاسية تجاه الجاردينيا اللي قلبها تعب من متابعتها الساكتة لرفرفة الفراشات اللي بتحوم .. لحد ما فقد - قلب الجاردينيا (بياض التلج) - دمويته .
حالتها الثابتة كانت بتساعدها إنها تسمع كتير ، و من سمعها إتعلمت هدايا كتيرة ، ماحدش عرفها من قبلها ولا من بعدها ..
بتكلم الشجر بلغة الشجر ، و الهدهد بلغة الهدهد ، و الجو البرد بلغة البرد ، و مسك الليل بلّيل ، بس ما بتعرفش تكلم الفراشات ، عشان الفراشات بتحكي برفرفة جناحتها ، و مابتحبش تكلم الصبار .. عشان لغته بتشوّك قوي !
ب ورقها اللي أصبح جناح ، و زهرتها اللي كما العيون .. جاردينيا صبحت فراشة بيضة بترفرف .. و بتحكي كل الأسرار بسرعة قبل ما تقع تاني في الأرض ، و تدبل و تموت .
كل أمنيتها : تكون جنية وجع القلب بتعرف تحدف لفوق عالي .. لاحسن قلبها مليان بالكلام ، و ورقها يا دوب بيتعلم يرفرف همس الفراشات .
بصربقي . انا بحب جدا جدا جدا اسلملك دماغي و انت بتكتب لانك بجد بتعرف تدخلني في حاله ما حدش عرف يدخلهالي كتير و هي اني افضل مبتسمه طول ما انا بقري و اقرالي بصوت عالي علشان اتونس بيا و انا في الحاله الحلوه دي . الوحيد اللي عرف يدخلني في الحاله دي هو كتاب عسول قرررت اسلفهوووووولك واخدلي بالي سلف بس اول ما اشوفك اسمه مملكه من عصير التفاح . اكيد في زيه كتير و احسن بس انا حابه اسلفك حاجه كانت بتقدر تخليني ابتسم في وسط زحمه شغل و تعب قلب كتير . ابتسم انت تستحق انك تبتسم اويييي يا نور :)
ردحذف